شہرِ قائد میں روزگار کے حصول کے لیے معصوم اور ضرورت مند خواتین کے ساتھ دھوکہ دہی کا ایک ہولناک واقعہ پیش آیا ہے جہاں نوکری کا فریب دے کر 54 لڑکیوں کو گڈاپ کے ایک فارم ہاؤس لے جایا گیا اور وہاں ان کے قیمتی موبائل فونز اور دیگر سامان لوٹ لیا گیا۔
متاثرہ لڑکیوں میں شامل ایک لڑکی نے انکشاف کیا کہ "موبائل فون پر ایک میسج آیا تھا کہ انٹرویو کی ایکٹیویٹی شروع ہونے والی ہے، جس کے بعد کال آئی اور بتایا گیا کہ انٹرویو ہوں گے اور 2 ہزار روپے یومیہ پر رکھا جائے گا۔ یہی نہیں بلکہ یہ بھی کہا گیا کہ وہیں انٹرویو کے بعد آپ لوگوں کو یونیفارم بھی دیے جائیں گے۔
تفصیلات کے مطابق ملزمان نے غریب اور پریشان حال لڑکیوں کو روزگار کا خواب دکھایا اور مختلف حیلوں بہانوں سے گڈاپ کے ایک فارم ہاؤس منتقل کیا۔ جہاں موقع ملتے ہی ملزمان ان کے 54 موبائل فونز اور دیگر قیمتی سامان لے کر فرار ہو گئے۔ واقعے کی ایک ویڈیو بھی سامنے آئی ہے جس میں موبائل فون اور سامان لے کر فرار ہونے والے مرکزی ملزم کو فارم ہاؤس اور انٹرویو کے حوالے سے ہدایات دیتے اور گائیڈ کرتے ہوئے صاف دیکھا جا سکتا ہے۔
اطلاع ملتے ہی پولیس نے فوری طور پر حرکت میں آتے ہوئے بروقت کارروائی کی۔ پولیس نے اس گھناؤنے فراڈ میں ملوث ایک مرکزی خاتون اور اس کے چند کارندوں کو حراست میں لے لیا ہے، جن سے تفتیش جاری ہے۔ پولیس حراست میں موجود ایک ملزم نے اعتراف کرتے ہوئے بتایا کہ مجھے 3 ہزار روپے یومیہ دینے کے لیے کہا گیا تھا۔
پولیس حکام کا کہنا ہے کہ واردات میں ملوث اور موبائل فونز لے کر روپوش ہونے والے اصل ملزم کی تلاش کے لیے چھاپے مارے جا رہے ہیں اور وائرل ویڈیو کی مدد سے اس کی شناخت کا عمل بھی جاری ہے تاکہ اسے جلد از جلد قانون کے کٹہرے میں لایا جا سکے۔ اس لرزہ خیز واقعے نے شہر میں نوکری کے نام پر ہونے والے فراڈ اور سیکیورٹی کے انتظامات پر ایک بار پھر سوالیہ نشان کھڑے کر دیے ہیں۔