کراچی کے علاقے بن قاسم ٹاؤن سے گزشتہ روز ملنے والی گولی لگی لاش کا معاملہ سامنے آیا ہے جہاں مقتولہ کی شناخت کشف کمال کے طور پر ہوئی ہے۔
کشف عظیم پورہ کی رہائشی اور سات بہن بھائیوں میں تیسرے نمبر پر تھی جس نے چار سال قبل یاسر درانی نامی شخص سے پسند کی شادی کی تھی اور اس کی ڈھائی سے پونے تین سال کی ایک بیٹی بھی ہے۔
اہل خانہ کے مطابق کشف گزشتہ ایک ہفتے سے اپنی بیٹی کے ہمراہ میکے میں مقیم تھی لیکن دو روز قبل اس کا شوہر یاسر درانی جو سولجر بازار کا رہائشی ہے اسے منا کر اپنے ساتھ لے گیا تھا۔
یاسر نے پہلے اہل خانہ کو بتایا تھا کہ کشف اپنے ایک دوست کے ساتھ گئی ہوئی ہے لیکن گزشتہ شب وہ سسرال پہنچا اور بتایا کہ کشف کئی گھنٹوں سے لاپتا ہے جس کے بعد وہ اطلاع دے کر گھر سے چلا گیا جبکہ آج صبح سے اس کا نمبر بھی بند جا رہا ہے۔
ورثاء کے مطابق آج صبح اہل خانہ کو فون کال کے ذریعے کشف کے قتل کی اطلاع موصول ہوئی جس کے بعد پولیس نے اس کے شوہر کو حراست میں لے کر مختلف پہلوؤں سے تحقیقات شروع کردیں۔