مالدیپ میں کھیلے جا رہے فٹبال ٹورنامنٹ کے ایک اہم میچ میں پاکستان نے افغانستان کو 0-2 سے شکست دے کر فائنل کے لیے کوالیفائی کرلیا ہے۔ اس ایونٹ میں قومی فٹبال ٹیم کی یہ مسلسل دوسری شاندار کامیابی ہے۔
میچ کے آغاز سے ہی پاکستانی کھلاڑیوں نے حریف ٹیم پر دباؤ بنائے رکھا، جس کے نتیجے میں کھیل کے پانچویں ہی منٹ میں عمر نواز نے بہترین فیلڈ گول کر کے ٹیم کو برتری دلا دی۔ اس کے بعد میچ کے آخری لمحات میں ہارون حامد نے انجری ٹائم کے دوران دوسرا گول داغ کر پاکستان کی فتح کو یقینی بنا دیا۔
پاکستانی فٹبال ٹیم اس ٹورنامنٹ میں اب تک ناقابلِ شکست رہی ہے۔ قومی ٹیم کا بنگلہ دیش کے خلاف کھیلا گیا پہلا میچ برابری پر ختم ہوا تھا، جبکہ اپنے دوسرے میچ میں پاکستان نے میزبان مالدیپ کو 0-3 سے عبرتناک شکست دی تھی اور اب افغانستان کو ہرا کر فائنل میں جگہ پکی کرلی ہے۔