آسٹریلیا میں حکام نے ایک تجارتی بریڈر کے قبضے سے ایک لاکھ سے زائد زندہ کاکروچ برآمد کرلیے ہیں جنہیں ملک کی تاریخ میں غیر ملکی بغیر ریڑھ کی ہڈی جانوروں کی سب سے بڑی ضبطی قرار دیا جا رہا ہے۔
حکام کے مطابق ریاست نیو ساؤتھ ویلز کے شہر باتھرسٹ میں کارروائی کے دوران مڈغاسکر ہِسنگ اور ڈوبیا نسل کے کاکروچ ضبط کیے گئے جن کی مالیت تقریباً 2 لاکھ آسٹریلوی ڈالر بتائی گئی ہے۔
ماہرین کے مطابق مڈغاسکر ہِسنگ کاکروچ دنیا کے بڑے کاکروچوں میں شمار ہوتا ہے اور اس کی لمبائی 5 سے 8 سینٹی میٹر تک ہوسکتی ہے۔
حکام نے واقعے کی تحقیقات شروع کردی ہیں جبکہ غیر قانونی طور پر رکھے گئے حشرات کی منتقلی اور افزائش سے متعلق قوانین کی خلاف ورزی کا جائزہ لیا جا رہا ہے۔