چین کی ایک یونیورسٹی میں صفائی کا کام کرنے والی 33 سالہ خاتون نے اپنی محنت سے ماسٹر پروگرام میں داخلہ حاصل کرکے انٹرنیٹ پر دھوم مچا دی ہے۔
سیچوان سے تعلق رکھنے والی لی جیا ماضی میں اپنے شوہر کے ساتھ ریسٹورنٹ چلاتی تھیں، مگر مالی مشکلات کے باعث انہوں نے چینگڈو یونیورسٹی آف ٹیکنالوجی میں کلینر کی ملازمت اختیار کرلی تاکہ لچکدار اوقات میں بچوں کی دیکھ بھال بھی کرسکیں۔
ملازمت کے دوران امتحانات کے لیے آنے والے بزرگ اور سخت محنت کرتے طلبا کو دیکھ کر وہ اتنی متاثر ہوئیں کہ انہوں نے اپنے بچوں کے لیے مثال بننے کا فیصلہ کیا۔ صرف ایک ووکیشنل اسکول کی تعلیم اور گریجویشن کی ڈگری نہ ہونے کے باوجود، انہوں نے ہار نہیں مانی۔
محض 8 ماہ کے مختصر وقت میں اضافی مضامین کی تیاری کے لیے وہ صبح 6 بجے یونیورسٹی آتیں اور ہیڈ فونز پر سیاست اور انگلش کے لیکچرز سنتے ہوئے صفائی کا کام کرتیں۔ شوہر کے بھرپور تعاون اور ایک سال کی انتھک پڑھائی کے بعد، بالآخر اپریل 2026 میں وہ اس 3 سالہ ماسٹر پروگرام کا حصہ بننے میں کامیاب ہوگئیں۔