ملک بھر کے بجلی صارفین کے لیے خوشخبری سامنے آگئی ہے بجلی کی قیمت میں ایک روپے 99 پیسے فی یونٹ کمی کر دی گئی ہے۔
جاری کردہ نوٹیفکیشن کے مطابق بجلی کی قیمت میں کمی جنوری تا مارچ 2026ء کی سہ ماہی ایڈجسٹمنٹ کی مد میں کی گئی ہے۔ یہ ریلیف جون سے اگست 2026ء تک تین ماہ کے لیے صارفین کو فراہم کیا جائے گا۔
نوٹیفکیشن میں کہا گیا ہے کہ قیمتوں میں کمی کا اطلاق ملک بھر کے تمام صارفین پر ہوگا، جبکہ کے الیکٹرک کے صارفین بھی اس سہولت سے مستفید ہوں گے۔
حکام کے مطابق بجلی کی قیمت میں اس کمی سے صارفین کو مجموعی طور پر 67 ارب 17 کروڑ 30 لاکھ روپے کا ریلیف ملے گا جس سے گھریلو اور تجارتی صارفین کے بجلی کے بلوں میں نمایاں کمی آنے کی توقع ہے۔