پاکستان ویمن کرکٹ ٹیم کے مینٹور وہاب ریاض کی دعوت پر پاکستان کرکٹ ٹیم کے سابق ہیڈ کوچ مکی آرتھر نے ڈربی میں ویمن ٹیم سے خصوصی ملاقات کی اور آئی سی سی ویمن ٹی ٹوئنٹی ورلڈ کپ کے لیے کھلاڑیوں کی حوصلہ افزائی کی۔
ملاقات کے دوران مکی آرتھر نے مقامی کنڈیشنز کے حوالے سے اپنے وسیع تجربے سے کھلاڑیوں کو آگاہ کیا اور ان کے جذبے اور اسکلز کی تعریف کی۔ انہوں نے کھلاڑیوں سے گفتگو کرتے ہوئے کہا کہ آپ سب میں بہترین پوٹینشل موجود ہے، اگر پلانز کے مطابق کھیلیں تو جیتنا مشکل نہیں ہے۔ انہوں نے ماضی کی مثال دیتے ہوئے بتایا کہ چیمپئینز ٹرافی 2017 میں پاکستان کرکٹ ٹیم کنڈیشنز سے ہم آہنگ ہونے کے بعد ہی اچھا کھیلی تھی، جہاں کھلاڑیوں نے شاندار ٹیم ورک کا مظاہرہ کیا، متحرک رہے اور پھر کامیابی ملی۔
مکی آرتھر نے ویمن ٹیم کو مشورہ دیا کہ وہ جلد از جلد یہاں کی کنڈیشنز سے ہم آہنگ ہوں اور اس کے بعد میدان میں اپنی بھرپور صلاحیتوں کا مظاہرہ کریں۔ انہوں نے کھلاڑیوں کو ڈٹ کر فائٹ کرنے کی تاکید کرتے ہوئے کامیابی کے لیے اپنی نیک خواہشات کا اظہار بھی کیا۔