فیفا کی جانب سے پاکستان کی قومی فٹبال ٹیم کو فیفا آسیان کپ میں شرکت کی باضابطہ دعوت دی گئی ہے جسے پاکستانی فٹبال کے لیے ایک اہم پیش رفت قرار دیا جا رہا ہے۔
ذرائع کے مطابق پاکستان فٹبال فیڈریشن نے بھی قومی ٹیم کی ٹورنامنٹ میں شرکت کی تصدیق کر دی ہے۔ ایونٹ 21 ستمبر سے 6 اکتوبر تک انڈونیشیا میں کھیلا جائے گا۔
پاکستان کو ڈویژن ون میں بھارت، میزبان انڈونیشیا، ملائشیا، فلپائن، سنگاپور اور تھائی لینڈ جیسی مضبوط ٹیموں کا سامنا ہوگا۔
یہ پہلا موقع ہوگا کہ پاکستان کسی ایسے بڑے فیفا ٹورنامنٹ میں حصہ لے گا جو ورلڈ کپ یا ایشین کوالیفائرز سے ہٹ کر منعقد کیا جا رہا ہو۔ ذرائع کے مطابق اس پیش رفت میں پی ایف ایف کے صدر محسن گیلانی کے فیفا حکام سے روابط نے بھی اہم کردار ادا کیا ہے۔