پاکستان کرکٹ بورڈ نے قومی کرکٹرز کی ذہنی و جسمانی تھکاوٹ دور کرنے اور انہیں تروتازہ (فریش) کرنے کے لیے نیشنل کرکٹ اکیڈمی (این سی اے) لاہور میں ایک عارضی پیڈل کورٹ قائم کردیا ہے۔
پاکستان کرکٹ بورڈ کی جانب سے اٹھائے گئے اس اقدام کا مقصد کھلاڑیوں کو روایتی اور سخت ٹریننگ کے ماحول سے تھوڑا ہٹ کر ایک ایسا تفریحی کھیل فراہم کرنا ہے جس سے ان کی فٹنس بھی برقرار رہے اور وہ ذہنی طور پر بھی خود کو پرسکون محسوس کرسکیں۔
این سی اے میں جاری تربیتی کیمپ میں موجود قومی اسکواڈ کے کھلاڑی اس عارضی پیڈل کورٹ میں بھرپور طریقے سے پیڈل ٹینس کھیلنے میں مصروف ہیں۔ کھلاڑیوں کے درمیان کھیل کے دوران دلچسپ مقابلے دیکھے جا رہے ہیں اور وہ اس نئی سرگرمی سے کافی لطف اندوز ہو رہے ہیں۔
اس موقع پر قومی ٹیم کے مایہ ناز فاسٹ بولر شاہین شاہ آفریدی اور سابق ٹیسٹ کرکٹر و موجودہ بولنگ کوچ عمر گل بھی کورٹ میں موجود رہے اور دونوں نے پیڈل ٹینس کھیلنے میں گہری دلچسپی کا مظاہرہ کیا۔ شاہین آفریدی اور عمر گل طویل وقت تک کورٹ میں پیڈل کھیلنے میں مصروف رہے اور کھیل کے دوران دونوں کے درمیان زبردست جوڑ پڑا۔ کیمپ میں موجود دیگر کھلاڑی اور کوچنگ اسٹاف بھی اس موقع پر کھلاڑیوں کی حوصلہ افزائی کرتا رہا۔