چین کے جنوبی علاقے میں ایک خاتون کے بازو میں موجود تکلیف دہ گلٹی نے اس وقت ڈاکٹروں کو حیرت میں ڈال دیا جب آپریشن کے دوران اس کے اندر سے تقریباً 10 سینٹی میٹر لمبے دو زندہ پیراسائیٹ برآمد ہوئے۔
صوبہ گوانگ ڈونگ کے شہر شینزن میں رہنے والی وانگ نامی خاتون ایک بڑے ابھار اور مسلسل درد کی شکایت لے کر اسپتال پہنچیں۔ ان کا کہنا تھا کہ بازو میں ایک چھوٹی سی گلٹی تقریباً ایک سال قبل نمودار ہوئی تھی، مگر وقت گزرنے کے ساتھ اس کا حجم بڑھتا گیا اور آخرکار ایک انڈے جتنی بڑی ہو گئی۔
خاتون کے مطابق گلٹی کے مقام پر شدید درد رہتا تھا جس کے باعث روزمرہ کے کام بھی متاثر ہونے لگے، جس کے بعد انہوں نے طبی معائنہ کرانے کا فیصلہ کیا۔
تفصیلی جانچ اور آپریشن کے دوران ڈاکٹروں نے بازو سے دو لمبے کیڑے نکالے جن کی شناخت اسپارگینم نامی پیراسائیٹ کے طور پر کی گئی۔ ماہرین کے مطابق یہ ایک ایسا طفیلی جاندار ہے جو بعض اوقات آلودہ خوراک یا غیر محفوظ غذائی عادات کے ذریعے انسانی جسم میں داخل ہو سکتا ہے۔
ڈاکٹروں سے گفتگو کرتے ہوئے خاتون نے بتایا کہ وہ اکثر گھر میں مینڈک پکاتی ہیں اور انہیں کاٹنے اور تیار کرنے کے لیے وہی کٹنگ بورڈ استعمال کرتی ہیں جس پر دیگر کھانے بھی تیار کیے جاتے ہیں۔
ماہرین کا خیال ہے کہ غالب امکان یہی ہے کہ کٹنگ بورڈ پیراسائیٹ کے انڈوں یا جراثیم سے آلودہ ہو گیا ہو، جس کے بعد یہ طفیلی کیڑے خوراک کے ذریعے جسم میں منتقل ہوئے اور آہستہ آہستہ مختلف ٹشوز میں حرکت کرتے ہوئے بازو میں جا پہنچے۔
ڈاکٹروں نے خبردار کیا کہ اس قسم کے پیراسائیٹس عموماً انسانی جسم میں بہت زیادہ بڑے نہیں ہوتے، تاہم یہ مختلف حصوں میں منتقل ہوتے رہتے ہیں۔ ان کی ایک عام علامت جلد کے نیچے بننے والی غیر معمولی گلٹیاں یا سوجن ہوتی ہیں، جنہیں اکثر لوگ معمولی مسئلہ سمجھ کر نظر انداز کر دیتے ہیں۔