صوبائی وزیر کھیل پنجاب ملک فیصل ایوب کھوکھر نے مشیر وزیراعلیٰ پنجاب علی ڈار کے ہمراہ ایشیا پیسفک پیڈل کپ میں شرکت کے لیے روانہ ہونے والی پاکستان کی قومی ٹیم سے خصوصی ملاقات کی۔
اس موقع پر کھلاڑیوں کی حوصلہ افزائی کرتے ہوئے ملک فیصل ایوب کھوکھر نے کہا کہ قومی کھلاڑی بین الاقوامی سطح پر پاکستان کے سفیر کی حیثیت رکھتے ہیں اور اس اہم ایونٹ کے لیے پوری قوم کی دعائیں ان کے ساتھ ہیں۔
کھیل کے فروغ کے حوالے سے گفتگو کرتے ہوئے صوبائی وزیر کھیل نے اس بات کا اعلان کیا کہ محرم الحرام کے بعد پنجاب میں ایک بڑے پیڈل ٹورنامنٹ کا انعقاد کروایا جائے گا۔
مزید برآں، انہوں نے سیالکوٹ میں ایک نئے پیڈل کورٹ کا جلد افتتاح کرنے اور صوبے بھر میں مزید 14 جدید پیڈل کورٹس کی تعمیر کا بھی اعلان کیا تاکہ نوجوانوں کو اس کھیل کی بہترین سہولیات میسر آسکیں۔