کراچی کے علاقے جوہر آباد میں خواتین کے سامنے نازیبا حرکات کرنے والے شخص کی سوشل میڈیا پر وائرل ہونے والی ویڈیو کا نوٹس لیتے ہوئے پولیس نے ملزم کو گرفتار کرلیا۔
پولیس کے مطابق وائرل ویڈیو میں موٹر سائیکل سوار ایک شخص کو خواتین کو ہراساں کرتے اور نازیبا حرکت کرتے دیکھا گیا تھا، جس کے بعد فوری کارروائی کرتے ہوئے ملزم ارسلان کو حراست میں لے لیا گیا۔ ملزم جوہر آباد کا رہائشی ہے۔
پولیس حکام کا کہنا ہے کہ دورانِ تفتیش ملزم نے اپنے جرم کا اعتراف کرلیا ہے، جبکہ اس کا ویڈیو بیان بھی ریکارڈ کرلیا گیا ہے۔
ابتدائی تحقیقات کے مطابق ملزم نے گزشتہ روز راشد منہاس روڈ پر لکی ون مال سے ناگن چورنگی جانے والے راستے میں یہ قابلِ اعتراض حرکت کی تھی، جس کی ویڈیو سوشل میڈیا پر گردش کرنے لگی تھی۔
جوہر آباد پولیس کے مطابق ملزم کے خلاف قانون کے مطابق مقدمہ درج کرکے مزید کارروائی جاری ہے۔