سرگودھا میں تھانہ سٹی کی حدود بلاک نمبر 8 میں کریانہ اسٹور کے دکاندار ارسلان نے مبینہ طور پر 8 سالہ معصوم بچی 'منتہاء' کو زیادتی اور شدید تشدد کا نشانہ بنا کر قتل کردیا اور لاش دکان میں چھوڑ کر فرار ہوگیا۔ بچی گھر کے قریب دکان سے چیز لینے گئی تھی۔
واقعے کی اطلاع ملتے ہی سٹی پولیس نے جائے وقوعہ کو سیل کر کے شواہد اکٹھے کیے اور مقتولہ کی لاش کو پوسٹ مارٹم کے لیے اسپتال منتقل کردیا۔
ڈی پی او سرگودھا صہیب اشرف نے واقعے کا سخت نوٹس لیتے ہوئے ملزم کی فوری گرفتاری کا حکم دیا ہے۔ پولیس نے مفرور ملزم ارسلان کی تلاش میں مختلف مقامات پر چھاپے مارتے ہوئے دکان کے 3 ملازمین کو حراست میں لے کر تفتیش شروع کردی ہے۔
اس اندوہناک واقعے کے بعد علاقے میں شدید غم و غصہ پایا جاتا ہے اور شہریوں نے اعلیٰ حکام سے ملزم کو سخت سے سخت سزا دینے کا مطالبہ کیا ہے۔