کوریا کی قومی ہاکی ٹیم نے پاکستان کے دورے کی باضابطہ تصدیق کر دی ہے جس کے بعد دونوں ممالک کے درمیان طویل عرصے بعد ہاکی روابط بحال ہونے جا رہے ہیں۔
ذرائع کے مطابق کورین ہاکی فیڈریشن نے پاکستان ہاکی فیڈریشن (پی ایچ ایف) کو دورے کے حوالے سے آگاہ کر دیا ہے۔ کوریا کی ٹیم 22 سال بعد پاکستان کا دورہ کرے گی، جسے ملکی ہاکی کے لیے ایک اہم پیش رفت قرار دیا جا رہا ہے۔
ذرائع کا کہنا ہے کہ پاکستان اور کوریا کی ہاکی ٹیموں کے درمیان چار میچوں کی سیریز اسلام آباد میں کھیلی جائے گی۔ سیریز کے مقابلے 26 جولائی سے 7 اگست کے درمیان ہوں گے۔
دونوں ٹیموں کے درمیان ہونے والے یہ میچز ایشیائی ہاکی میں مسابقتی ماحول کو فروغ دینے کے ساتھ ساتھ پاکستان میں بین الاقوامی ہاکی کی بحالی کے لیے بھی اہم سمجھے جا رہے ہیں۔ذرائع کے مطابق باہمی معاہدے کے تحت پاکستان کی قومی ہاکی ٹیم ستمبر میں کوریا کا دورہ بھی کرے گی۔