پاکستان اور بھارت کے درمیان ایف آئی ایچ پرو ہاکی لیگ کے میچ کے دوران پاکستانی قومی پرچم غلط انداز میں دکھائے جانے کے معاملے پر انٹرنیشنل ہاکی فیڈریشن نے باضابطہ معذرت کر لی۔
ایف آئی ایچ کی جانب سے جاری بیان میں کہا گیا ہے کہ میچ کے دوران پاکستانی پرچم غلط دکھایا گیا، جس پر ادارہ پاکستان سے غیر مشروط معذرت خواہ ہے۔
فیڈریشن نے اس واقعے کی مکمل ذمہ داری قبول کرتے ہوئے کہا کہ مستقبل میں ایسے واقعات کی روک تھام کے لیے اپنے طریقہ کار اور انتظامی اقدامات کا ازسرِنو جائزہ لیا جائے گا۔
ایف آئی ایچ نے مزید کہا کہ اس غلطی سے پاکستانی ٹیم، شائقین اور عوام کی دل آزاری ہوئی، جس پر وہ دلی معذرت پیش کرتی ہے۔
انٹرنیشنل ہاکی فیڈریشن نے پاکستان ہاکی فیڈریشن سے بھی باضابطہ طور پر معذرت کرتے ہوئے یقین دہانی کرائی کہ آئندہ بین الاقوامی مقابلوں میں ایسی کسی کوتاہی سے بچنے کے لیے ضروری اقدامات کیے جائیں گے۔