فٹ بال ورلڈ کپ میں ٹیم کے ناک آؤٹ راؤنڈ تک رسائی حاصل نہ کرنے پر اسکاٹ لینڈ کے ہیڈ کوچ اسٹیو کلارک اپنے عہدے سے مستعفی ہوگئے ہیں۔ وہ گزشتہ سات برس سے اسکاٹش فٹ بال ٹیم کے ہیڈ کوچ کے فرائض انجام دے رہے تھے۔
میگا ایونٹ میں گروپ سی کا حصہ رہنے والی اسکاٹ لینڈ کی ٹیم نے پہلے میچ میں ہیٹی کو ایک صفر سے ہرا کر ایونٹ کا اچھا آغاز کیا تھا، تاہم اسے اگلے میچوں میں مراکش کے ہاتھوں ایک صفر اور برازیل سے تین صفر سے شکست کا سامنا کرنا پڑا۔
اسکاٹ لینڈ کی اگلے مرحلے میں کوالیفائی کرنے کی امیدیں گروپ ایل میں ہونے والے کروشیا اور گھانا کے میچ سے وابستہ تھیں، مگر اس میچ میں گھانا کو کروشیا کے ہاتھوں دو ایک سے شکست کا سامنا کرنا پڑا، جس کے باعث اسکاٹ لینڈ کا ٹورنامنٹ میں سفر ختم ہوگیا۔
اسکاٹس فٹ بال ایسوسی ایشن کی جانب سے جاری کردہ بیان میں اسٹیو کلارک کے استعفے کی تصدیق کی گئی ہے، جس میں انہوں نے ایسوسی ایشن، کھلاڑیوں اور شائقین کا شکریہ ادا کرتے ہوئے نئے آنے والے ہیڈ کوچ کے لیے نیک تمناؤں کا اظہار کیا ہے۔