کراچی کے علاقے ڈاکس کی ہجرت کالونی میں ایک انتہائی افسوسناک واقعہ پیش آیا ہے جہاں ایک نشے کے عادی شخص نے محض 20 روپے نہ دینے پر ایک بچے کے گلے پر بلیڈ مار کر اسے شدید زخمی کردیا۔
حنیف ولد انور نامی متاثرہ بچے نے اپنے بیان میں بتایا ہے کہ سمندر کی طرف موجود جنگل کے قریب ایک نشئی نے اس سے بیس روپے مانگے، اور پیسے نہ دینے پر اس نے بلیڈ سے گلا کاٹ دیا۔ واقعے کے بعد سول لائن پولیس کی جانب سے بچے کا میڈیکل کروا لیا گیا ہے اور پولیس حکام کا کہنا ہے کہ بچے کی حالت اب خطرے سے باہر ہے۔ پولیس کے مطابق ملزم کی تلاش کے لیے کارروائی شروع کردی گئی ہے۔
دوسری جانب علاقہ مکینوں کا کہنا ہے کہ سمندر کی طرف نشے کے عادی افراد کے باقاعدہ ڈیرے موجود ہیں، جو نہ صرف عام شہریوں سے لوٹ مار کرتے ہیں بلکہ انہیں تشدد کا نشانہ بھی بناتے ہیں، جس کی وجہ سے علاقے میں شدید خوف و ہراس پایا جاتا ہے۔
پولیس کے مطابق مذکورہ واقعہ تھانہ سول لائن کے علاقے ہجرت کالونی گلی نمبر 42 کے قریب پیش آیا، جبکہ نشئی بنام آصف عرف چیتے ولد گلزار مددگار 15 کی جانب سے علاقہ مکینوں کی اطلاع پر گرفتار ہوچکا ہے۔