کراچی کے کرنسی بازاروں میں امریکی ڈالر کی قیمت کے حوالے سے ملا جلا رجحان دیکھا گیا ہے، جہاں انٹر بینک مارکیٹ میں ڈالر کی قدر میں کمی ریکارڈ کی گئی، وہیں اوپن مارکیٹ میں اس کی قیمت میں اضافہ ہوا ہے۔
اسٹیٹ بینک آف پاکستان کی جانب سے جاری کردہ اعداد و شمار کے مطابق، انٹر بینک میں امریکی ڈالر مزید 3 پیسے سستا ہوگیا، جس کے بعد اس کی قیمت 278 روپے 20 پیسے سے گھٹ کر 278 روپے 17 پیسے پر بند ہوئی ہے۔
دوسری جانب، ایکسچینج کمپنیز ایسوسی ایشن آف پاکستان (ای کیپ) کے مطابق، اوپن مارکیٹ میں انٹر بینک کے برعکس صورتحال رہی، جہاں خریداروں کی مانگ بڑھنے کے باعث ڈالر کی قیمت میں 9 پیسے کا اضافہ ریکارڈ کیا گیا۔ اس اضافے کے بعد اوپن مارکیٹ میں امریکی ڈالر 279 روپے 50 پیسے سے بڑھ کر 279 روپے 59 پیسے کی سطح پر پہنچ گیا ہے۔