شہر قائد کے ٹریفک سگنلز پر کتابیں بیچنے کے بہانے گاڑیوں سے جان بوجھ کر ٹکرا کر شہریوں کو لوٹنے والا پیدل گروہ سرگرم ہوگیا ہے۔
شاہراہِ قائدین پر اللہ والا سگنل کے پاس پیش آنے والے ایک واقعے میں ایک ملزم نے کھڑی گاڑی سے ٹکرانے کا ڈرامہ رچا کر اس کا سائیڈ مرر ٹیڑھا کردیا۔ گاڑی میں سوار شہری نے جب اس معاملے پر شیشہ نیچے کرکے ملزم سے پوچھ گچھ شروع کی، تو اسی دوران اس کے دوسرے ساتھی نے پچھلی طرف سے گاڑی پر زور زور سے ہاتھ مارنا شروع کر دیے۔ جیسے ہی شہری نے متوجہ ہو کر پیچھے دیکھا، کتابیں لیے کھڑے ملزم نے جھپٹ کر اس کا موبائل فون چھینا اور دونوں موقع سے فرار ہوگئے۔
فیروز آباد پولیس کا کہنا ہے کہ سگنلز پر اس نوعیت کی متعدد وارداتیں سامنے آچکی ہیں، جہاں ملزمان وائپر سے گاڑی کی ونڈ اسکرین گندی کر کے جان بوجھ کر جھگڑا پیدا کرتے ہیں اور شہریوں کا دھیان بٹا کر انہیں لوٹ لیتے ہیں۔