کراچی کے مختلف علاقوں میں گیس کی بُو پھیلنے اور لیکیج کی موصول ہونے والی شکایات پر سوئی سدرن گیس کمپنی کا موقف سامنے آ گیا۔
ترجمان سوئی سدرن کے مطابق ابوالحسن اصفہانی روڈ گلشن سے گلشنِ معمار تک 16 انچ قطر کی نئی گیس پائپ لائن کو فعال کر کے فراہمی شروع کردی گئی ہے، جس کے بعد کمپنی اپنے پلانٹ کی ٹیسٹنگ کر رہی ہے۔
ٹیسٹنگ کے اس عمل کے دوران گیس میں بُو پیدا کرنے والے کیمیائی مادے (اوڈورینٹ) کی مقدار معمول سے زیادہ شامل کی گئی ہے، جس کی وجہ سے بعض مقامات پر شہریوں کو زیادہ بُو محسوس ہو رہی ہے اور گیس لیکیج کی شکایات سامنے آ رہی ہیں۔
ترجمان سوئی سدرن نے واضح کیا ہے کہ گیس سسٹم کے تمام پریشر بالکل درست ہیں اور اب تک کسی قسم کی گیس لیکیج رپورٹ نہیں ہوئی۔ یہ بُو صرف ٹیسٹنگ کے باعث اوڈورینٹ کی زیادہ مقدار کی وجہ سے آرہی ہے، لہٰذا کمپنی صارفین سے درخواست کرتی ہے کہ وہ پریشان نہ ہوں اور اطمینان کے ساتھ اپنے معمول کے کام جاری رکھیں۔
ترجمان سوئی سدرن گیس کمپنی سلمان صدیقی کے مطابق گزشتہ شب شروع کیا جانے والا کمیشننگ کا عمل اب اختتام پذیر ہوچکا ہے، جس کے نتیجے میں ابوالحسن اصفہانی روڈ، گلشن معمار، الآصف اسکوائر، میٹروول سمیت گلشنِ اقبال اور اسکیم 33 کے بعض علاقوں میں گیس کی فراہمی بحال کردی گئی ہے۔