امریکا کی ریاست کیلیفورنیا میں منعقد ہونے والی سالانہ ورلڈ ڈاگ سرفنگ چیمپئن شپ میں مختلف نسلوں کے کتوں نے سرفنگ کی شاندار مہارت کا مظاہرہ کرتے ہوئے حاضرین کو خوب محظوظ کیا۔
شمالی کیلیفورنیا کے شہر پیسیفیکا کے ساحل پر ہونے والے اس منفرد ایونٹ میں چھوٹے اسپینیلز سے لے کر بڑے لیبراڈور کتوں تک نے حصہ لیا۔ ججز نے کتوں کی کارکردگی کا جائزہ سرف بورڈ پر توازن، لہروں پر قیام اور اعتماد کے ساتھ سرفنگ کی بنیاد پر لیا۔
رنگ برنگی لائف جیکٹس پہنے کتوں کو ان کے مالکان سرف بورڈ پر لہروں تک لے گئے، جہاں انہوں نے کامیابی سے ساحل تک سرفنگ کر کے تماشائیوں سے خوب داد وصول کی۔ ایونٹ کے ساتھ پالتو جانوروں کو گود لینے کی مہم اور مقامی فلاحی اداروں کے لیے فنڈ ریزنگ کا بھی اہتمام کیا گیا۔
شرکا میں شامل صوفیہ سیڈلووسکی نے بتایا کہ ان کے منی ایچر پنشر کتے رسٹی نے پہلی ہی بار لہر پر کامیاب سرفنگ کر کے سب کو حیران کر دیا جس کے بعد وہ اس منفرد کھیل کا مستقل حصہ بن گیا۔