تھائی لینڈ میں فٹبال کے ایک سیمی فائنل میچ کے دوران پیش آنے والے افسوسناک واقعے میں آسمانی بجلی گرنے سے ایک کھلاڑی جان کی بازی ہار گیا، جبکہ 12 دیگر افراد زخمی ہو گئے۔
واقعے کی ویڈیو میں دیکھا جا سکتا ہے کہ میچ جاری تھا کہ اچانک آسمانی بجلی میدان میں گری اور ایک کھلاڑی اس کی زد میں آ گیا۔ بجلی لگنے سے 24 سالہ سوفوان اوائے موقع پر ہی دم توڑ گیا، جبکہ زخمی ہونے والوں میں ایک ملائیشین کھلاڑی بھی شامل ہے۔
یہ حادثہ 4 اگست کی شام تھائی لینڈ کے صوبہ ناراتھیوات کے علاقے سنگائی کولوک میں واقع سنتی پھاپ اسٹیڈیم میں گولوک ایف اے کپ فٹبال ٹورنامنٹ کے سیمی فائنل کے دوران پیش آیا۔
مقامی پولیس کے مطابق میچ شدید بارش کے باوجود مقامی وقت کے مطابق شام تقریباً ساڑھے پانچ بجے جاری تھا، اسی دوران اچانک آسمانی بجلی گرنے سے میدان میں افراتفری مچ گئی۔
حکام کے مطابق مقابلہ ابو ایکس نونگ سیرن اور سام کولٹ کے درمیان کھیلا جا رہا تھا۔ سام کولٹ ایسی مشترکہ ٹیم ہے جس میں تھائی لینڈ اور ملائیشیا کے کھلاڑی شامل ہیں۔
واقعے کے بعد زخمیوں کو فوری طور پر طبی امداد فراہم کی گئی، جبکہ حکام نے حادثے کی مزید تحقیقات شروع کردی ہیں۔