میساچوسٹس انسٹیٹیوٹ آف ٹیکنالوجی کے سائنسدانوں نے ایک ایسا جدید روبوٹ تیار کیا ہے جو پرندوں کی طرح فضا میں اڑنے اور مچھلی کی طرح پانی میں تیرنے کی صلاحیت رکھتا ہے۔
ایرو ایکواٹک روبوٹکس ٹیم کی جانب سے تیار کیے گئے 250 گرام وزنی اس روبوٹ کی قیمت تقریباً 300 ڈالر ہے۔ نائیلون کے پروں اور دم سے لیس یہ روبوٹ بیٹری سے چلنے والی موٹر پر کام کرتا ہے اور اسے پرندوں، خصوصاً غوطہ خور پرندوں کی حرکات سے متاثر ہو کر ڈیزائن کیا گیا ہے۔
سائنسدانوں کے مطابق یہ روبوٹ 13.4 میل فی گھنٹہ کی رفتار سے پرواز اور 2.2 میل فی گھنٹہ کی رفتار سے تیراکی کر سکتا ہے، جبکہ ایک بار چارج ہونے پر 6 کلومیٹر تک اڑنے اور 2 کلومیٹر تک تیرنے کی صلاحیت رکھتا ہے۔
ماہرین کا کہنا ہے کہ مستقبل میں اس روبوٹ کو سمندری ماحول کی نگرانی، تحقیق اور سمندری حیات کے تحفظ کے لیے استعمال کیا جا سکتا ہے۔ روبوٹ کی کامیاب آزمائش میساچوسٹس کے واٹر ٹینک اور سوئٹزرلینڈ کی جنیوا جھیل میں کی جا چکی ہے۔