آل پاکستان گڈز ٹرانسپورٹ اتحاد کے صدر ملک شہزاد اعوان نے کہا ہے کہ وفاقی اور سندھ حکومت کے ساتھ مذاکرات ناکام ہوگئے ہیں جس کے بعد ٹرانسپورٹرز نے ہفتہ 8 اگست سے ملک گیر غیر معینہ مدت کی ہڑتال کا فیصلہ برقرار رکھا ہے۔
ملک شہزاد اعوان نے کہا کہ وفاقی اور سندھ حکومت مذاکرات میں سنجیدہ نظر نہیں آئیں اس لیے ہڑتال کے فیصلے سے پیچھے نہیں ہٹیں گے۔
انہوں نے بتایا کہ مذاکرات میں وفاقی حکومت کی جانب سے وزیر مواصلات، سیکریٹری مواصلات، چیئرمین این ایچ اے اور آئی جی موٹروے سمیت متعلقہ حکام شریک تھے جبکہ سندھ حکومت کی جانب سے کمشنر کراچی، سیکریٹری ٹرانسپورٹ، سیکریٹری ایکسائز، ڈی آئی ٹریفک اور دیگر متعلقہ حکام موجود تھے۔