پیٹرولیم ڈیلرز اور حکومت کے درمیان مذاکرات میں ڈیڈ لاک برقرار ہے حکومت نے یومیہ پیٹرولیم قیمتوں کے تعین کا فیصلہ واپس لینے سے انکار کردیا۔
ذرائع کے مطابق گزشتہ روز پاکستان پیٹرولیم ڈیلرز ایسوسی ایشن (پی پی ڈی اے) اور وزارتِ پیٹرولیم کے درمیان پانچ گھنٹے تک مذاکرات ہوئے تاہم مذاکرات بے نتیجہ رہے۔
حکومت نے ڈیلرز مارجن میں ایک روپے 34 پیسے فی لیٹر اضافے کی پیشکش کی تاہم اس کی منظوری وفاقی کابینہ سے مشروط کردی گئی۔
پیٹرولیم ڈیلرز کے 72 گھنٹے کے الٹی میٹم پر وزیر پیٹرولیم نے ناراضگی کا اظہار کیا جبکہ حکومت ڈیلرز کو ہڑتال کی کال واپس لینے پر رضامند نہ کرسکی۔
ذرائع کے مطابق مذاکرات ناکام ہونے پر پیٹرولیم ڈیلرز کا وفد آج کراچی واپس پہنچے گا اور ایگزیکٹو کمیٹی کا ہنگامی اجلاس طلب کیا گیا ہے۔پی پی ڈی اے کے مطابق ڈیلرز ہفتہ کی صبح ہڑتال کے فیصلے پر بدستور قائم ہیں۔