وفاقی حکومت اور پیٹرولیم ڈیلرز کے نمائندوں کے درمیان مذاکرات کے بعد ہڑتال کے معاملے پر اہم پیش رفت سامنے آئی ہے۔
ہڑتال کی کال کے بعد وفاقی کابینہ کی اقتصادی رابطہ کمیٹی (ای سی سی) کا اجلاس آج شام 6 بجے طلب کرلیا گیا ہے جس میں پیٹرولیم ڈیلرز کے مارجن میں اضافے کی وزارتِ پیٹرولیم کی سمری پر غور کیا جائے گا۔
انڈسٹری ذرائع کے مطابق ای سی سی اجلاس کا واحد ایجنڈا پیٹرولیم ڈیلرز مارجن پر نظرثانی ہے۔ سمری میں پیٹرول اور ڈیزل پر ڈیلر مارجن بڑھانے کی تجویز دی گئی ہے۔
ذرائع کا کہنا ہے کہ وفاقی وزیر خزانہ کی زیر صدارت اجلاس میں ڈیلرز مارجن بڑھانے سے متعلق اہم فیصلہ متوقع ہے، جس کے بعد ہفتے کی صبح سے ملک بھر میں پیٹرول پمپس کی ہڑتال ملتوی ہونے کا امکان ہے۔ذرائع کے مطابق اوگرا نے آئل مارکیٹنگ کمپنیوں کے مارجن کو ڈیجیٹلائزیشن کے ساتھ منسلک کر رکھا ہے۔