حکومت اور پیٹرولیم ڈیلرز کے درمیان مذاکرات کے بعد اہم پیش رفت سامنے آگئی، پیٹرولیم ڈیلرز کا فی لیٹر مارجن ایک روپے 34 پیسے بڑھانے کا فیصلہ کیا گیا ہے۔
پاکستان پیٹرولیم ڈیلرز ایسوسی ایشن کے عہدیداران نے ہڑتال کی کال واپس لینے کا اعلان کردیا۔ پی پی ڈی اے کے نائب صدر طارق حسن کے مطابق اضافے کے بعد پیٹرول پر ڈیلرز کا مارجن 10 روپے فی لیٹر ہوجائے گا۔
چیئرمین پی پی ڈی اے ملک خدا بخش نے بتایا کہ وزارتِ پیٹرولیم نے پیٹرولیم مصنوعات کی قیمتوں میں یومیہ رد و بدل کے نظام سے متعلق سمری وزیراعظم کو بھجوا دی ہے۔
ان کے مطابق حکومت کے پاس ڈیلرز کے تین سالہ انفلیشن ایڈجسٹمنٹ کی مد میں 50 ملین ڈالر موجود ہیں۔ یومیہ قیمتوں کے نظام میں تبدیلی کرکے قیمتوں کے رد و بدل کا دورانیہ سات روز تک کیا جاسکتا ہے۔
پی پی ڈی اے کے مطابق پیٹرولیم قیمتوں میں تبدیلی کا حتمی فیصلہ وزیراعظم کی سمری کے بعد ای سی سی اور وفاقی کابینہ کرے گی۔