پنجاب کے تعلیمی بورڈز نے امتحانی پرچوں کی جانچ اور مارکنگ کا طریقہ کار تبدیل کرنے کا فیصلہ کرلیا ہے۔ نئے نظام کے تحت مجموعی اندازے کے بجائے ہر سوال کے نمبروں کے لیے واضح اور مقررہ معیار وضع کیا جائے گا۔
بورڈ حکام کے مطابق امتحانات میں روبریکس مارکنگ کا نظام متعارف کرایا جائے گا، جس کے ذریعے ہر سوال کے جواب کو طے شدہ معیار کے مطابق جانچا جائے گا۔ اس طریقہ کار سے طلبہ کو سوال کے مختلف حصوں کے مقررہ معیار پر پورا اترنے کی صورت میں مناسب نمبر مل سکیں گے۔
نئے مارکنگ سسٹم کا اطلاق لاہور سمیت پنجاب کے تمام تعلیمی بورڈز میں کیا جائے گا، جبکہ اس پر عملدرآمد دوسرے سالانہ امتحانات سے شروع کرنے کا فیصلہ کیا گیا ہے۔
حکام کے مطابق سوالیہ پرچوں کی تیاری اور جوابی کاپیوں کی جانچ کے معیار کو مزید بہتر بنانے کے لیے پیپر مارکرز سے بھی رائے اور تجاویز حاصل کی جائیں گی۔ پیپر مارکرز سوالات اور مارکنگ کے طریقہ کار سے متعلق اپنی رپورٹس متعلقہ تعلیمی بورڈز کو جمع کرائیں گے۔
بورڈ حکام کا کہنا ہے کہ نئے نظام کا بنیادی مقصد امتحانی عمل میں شفافیت اور مارکنگ میں یکسانیت پیدا کرنا ہے۔ اس کے علاوہ نتائج کی ساکھ بہتر بنانا اور پنجاب کے تعلیمی بورڈز کے امتحانی نتائج کو عالمی معیار سے ہم آہنگ کرنا بھی اصلاحات کے اہم مقاصد میں شامل ہے۔
نئے طریقہ کار کے تحت ہر سوال کے لیے نمبروں کی تقسیم اور جانچ کا واضح معیار موجود ہوگا، جس سے طلبہ کی جوابی کاپیوں کی جانچ میں غیر ضروری فرق کم کرنے اور مجموعی طور پر مارکنگ کا معیار بہتر بنانے میں مدد ملے گی۔