ڈاکس تھانہ کی حدود مچھر کالونی اخلاص چوک کے قریب پولیس اور ڈاکوؤں کے درمیان مبینہ مقابلے میں 3 ڈاکو ہلاک جبکہ 1 پولیس اہلکار اور 1 شہری زخمی ہوگیا۔
اطلاع ملتے ہی ایدھی ایمبولینسز موقع پر پہنچ گئیں اور زخمی ہونے والے پولیس اہلکار اور شہری کو فوری طبی امداد کے لیے سول اسپتال منتقل کردیا، جبکہ ہلاک ہونے والے ڈاکوؤں کی لاشوں کو بھی ضابطے کی کارروائی کے لیے اسپتال منتقل کیا گیا۔
زخمیوں کی شناخت 33 سالہ پولیس کانسٹیبل کلیم اللہ ولد دوست محمد اور 20 سالہ شہری یوسف ولد اصغر کے نام سے ہوئی ہے۔
ہلاک ہونے والے تینوں ڈاکوؤں کی فوری طور پر شناخت نہیں ہوسکی، جن کی عمریں بالترتیب 38 سال، 30 سال اور 30 سال کے قریب بتائی جاتی ہیں۔ پولیس نے واقعے کی تحقیقات کا آغاز کردیا ہے۔