وفاقی وزیر پیٹرولیم علی پرویز ملک وزیر اعظم کی واضح ہدایت کے باوجود کراچی نہ پہنچ سکے۔
گزشتہ روز وزیر اعظم شہباز شریف نے وزیر پیٹرولیم کو ڈیزل کی قیمتوں میں کمی کے لیے کراچی میں قائم ریفائنریز سے مذاکرات کرنے کی ہدایت کی تھی۔
تیل کی صنعت سے وابستہ ذرائع کے مطابق وزیر پیٹرولیم کا فی الحال کراچی کے دورے کا کوئی شیڈول طے نہیں ہے۔
اس صورتحال پر آئل کمپنیز ایڈوائزری کونسل (OCAC) کے سیکریٹری نے واضح کیا کہ انہیں اب تک وزیر پیٹرولیم کی جانب سے ملاقات یا مذاکرات کا کوئی پیغام موصول نہیں ہوا ہے۔
سیکریٹری او سی اے سی ناظر علی زیدی کا اس حوالے سے کہنا تھا کہ جدید دور میں رابطہ قائم کرنے کے لیے بالمشافہ ملاقات ضروری نہیں ہے اور یہ اجلاس زوم (Zoom) کے ذریعے بھی ممکن بنایا جاسکتا ہے۔