پنجاب حکومت نے مبینہ غیر اخلاقی رقص اور نامناسب اشاروں کے الزام میں 8 اسٹیج اداکاراؤں پر ایک ماہ کی پابندی عائد کردی۔
محکمہ اطلاعات و ثقافت پنجاب کی جانب سے جاری نوٹیفکیشن کے مطابق پابندی کا سامنا کرنے والی اداکاراؤں میں ماہی راجپوت، حنا شیخ، ملائکہ شہزادی، مدیحہ خان، مہک نور اور مانو ملتانی شامل ہیں۔
نوٹیفکیشن کے مطابق رائمہ مہر اور حسنہ جٹ بھی ایک ماہ تک تھیٹر میں پرفارم نہیں کرسکیں گی۔
محکمہ اطلاعات و ثقافت کے مطابق مذکورہ اداکاراؤں پر تھیٹر پرفارمنس کے دوران غیر اخلاقی ڈانس اور نامناسب اشارے کرنے کے الزامات ہیں۔
نوٹیفکیشن میں متعلقہ حکام کو پابندی کے فیصلے پر سختی سے عملدرآمد یقینی بنانے کی ہدایت کی گئی ہے۔