ہری پور میں 15 روز قبل لاپتہ ہونے والی کمسن بچی آیت نور کی لاش یونیورسٹی ٹاؤن کے ایک کنویں سے برآمد کرلی گئی۔
پولیس کے مطابق آیت نور گھر سے باہر کھیلنے کے لیے نکلی تھی، جس کے بعد وہ لاپتا ہوگئی۔ پولیس نے واقعے کی تحقیقات کے دوران تین مشتبہ ملزمان کو گرفتار کیا، جن میں سے دو جیل میں ہیں جبکہ ایک پولیس حراست میں ہے۔
پولیس کا کہنا ہے کہ ملزمان نے مبینہ طور پر بچی کو زیادتی کا نشانہ بنانے کے بعد قتل کیا اور لاش کنویں میں پھینک دی۔
لاش برآمد ہونے کے بعد اسے ٹراما سینٹر ہری پور منتقل کیا گیا، جہاں آیت نور کے اہل خانہ اور شہریوں کی بڑی تعداد جمع ہوگئی۔ بچی کی لاش دیکھ کر والد غم سے نڈھال ہوگئے۔
واقعے پر مشتعل شہریوں نے ٹراما سینٹر کے باہر احتجاج کرتے ہوئے سڑک بلاک کردی۔ شہریوں نے مطالبہ کیا کہ کمسن آیت نور کے قتل میں ملوث ملزمان کو سخت سے سخت سزا دی جائے۔
پولیس کے مطابق واقعے کی مزید تفتیش جاری ہے، جبکہ گرفتار ملزمان سے بھی تحقیقات کی جارہی ہیں۔