خیبر پختونخوا کے اضلاع جنوبی وزیرستان اپر اور باجوڑ میں ہونے والے دو مختلف بم دھماکوں کے نتیجے میں ایک شخص جاں بحق جبکہ بچوں سمیت 10 افراد زخمی ہوگئے۔
جنوبی وزیرستان اپر کے علاقے مکین بازار میں سڑک کے کنارے کھڑی ایک موٹر سائیکل میں نصب آئی ای ڈی دھماکے سے پھٹ گئی، جس کے نتیجے میں ایک شخص جاں بحق اور 8 افراد زخمی ہوگئے۔ آر پی او ڈیرہ اسماعیل خان کے مطابق تمام زخمیوں کو فوری طور پر مکین کے قریبی طبی مرکز منتقل کر دیا گیا ہے۔
دوسرا واقعہ باجوڑ کے علاقے ڈمہ ڈولہ خوڑ میں پیش آیا جہاں سڑک کے کنارے نصب ریموٹ کنٹرول بم دھماکے کی زد میں آ کر 10 اور 11 سال کی عمر کے 2 بچے زخمی ہوگئے۔ ڈی ایس پی باجوڑ کے مطابق متاثرہ بچوں کو طبی امداد کی فراہم کے لیے ڈی ایچ کیو اسپتال خار منتقل کردیا گیا ہے۔
دونوں واقعات کے بعد پولیس اور سیکیورٹی فورسز نے متعلقہ علاقوں کو گھیرے میں لے کر شواہد اکٹھے کر لیے ہیں اور واقعات کی باقاعدہ رپورٹ درج کر کے مزید تحقیقات کا آغاز کردیا ہے۔