آل پاکستان گڈز ٹرانسپورٹ اتحاد کے صدر ملک شہزاد اعوان نے وفاقی وزیرِ مملکت برائے داخلہ طلال چوہدری سے اسلام آباد میں ملاقات کی، جس میں اسلام آباد میں روکے گئے کنٹینرز اور سامان سے لدی گاڑیوں سے متعلق درپیش مسائل پر تفصیل سے بات چیت کی گئی۔
ملاقات میں پاکستان گڈز ٹرانسپورٹ الائنس کے چیئرمین نثار حسین جعفری اور بختاور خان بھی موجود تھے۔ ملک شہزاد اعوان نے وفاقی وزیر کو آگاہ کیا کہ گاڑیوں اور کنٹینرز میں ادویات اور اشیائے خوردونوش موجود ہیں، جن کے خراب ہونے کا شدید اندیشہ ہے۔
ٹرانسپورٹ اتحاد کے صدر کی جانب سے روکی گئی تمام گاڑیوں کی فوری رہائی کے ساتھ مالکان کو نقصان کا معاوضہ دینے کا بھی مطالبہ کیا گیا۔
وفاقی وزیر طلال چوہدری نے آئی جی اسلام آباد کو سامان سے لدی گاڑیوں کو فوری ریلیز کرنے کی ہدایت جاری کی اور ٹرانسپورٹرز کو تمام روکی گئی گاڑیوں کی فوری رہائی کے ساتھ معاوضہ فراہم کرنے کی بھی یقین دہانی کروائی۔