برسوں کے انتظار کے بعد ملکی ریفائنریوں کی اپ گریڈیشن کے حوالے سے اہم پیش رفت سامنے آگئی انٹر اسٹیٹ گیس سسٹم اور ریفائنریز کے درمیان معاہدے پر دستخط ہوگئے۔
اٹک ریفائنری، نیشنل ریفائنری، پاکستان ریفائنری اور سنرجیکو نے اہم پیش رفت سے پاکستان اسٹاک ایکسچینج کو آگاہ کردیا۔ معاہدے کے تحت آئندہ پانچ سال میں ریفائنریز کو جدید معیار پر منتقل کیا جائے گا۔
معاہدے سے ریفائنری سیکٹر میں تقریباً 6 ارب ڈالر کی سرمایہ کاری کی راہ ہموار ہوگی جبکہ یورو فائیو معیار کا ایندھن تیار کرنے، فرنس آئل اور پیٹرولیم مصنوعات کی درآمدات کم کرنے میں مدد ملے گی۔
معاہدے کے مطابق ملکی ریفائنریوں کی پیداواری صلاحیت میں بھی نمایاں اضافہ متوقع ہے۔ ماہرین کے مطابق پپٹرولیم درآمدات میں کمی سے پاکستان کو سالانہ تقریباً 1.5 ارب ڈالر کی بچت ہوسکتی ہے۔
ذرائع کے مطابق وزیراعظم کی بیرون ملک سے واپسی پر اس پیش رفت کے حوالے سے تقریب کا انعقاد متوقع ہے جبکہ بورڈ کی منظوری کے بعد پارکو ریفائنری بھی جلد معاہدے پر دستخط کرے گی۔