انکم ٹیکس گوشوارے جمع کرانے کی آخری تاریخ 30 ستمبر مقرر ہے تاہم آخری تاریخ میں چند روز باقی رہ جانے کے باوجود ٹیکس دہندگان کو ایف بی آر کے آئی آر آئی ایس سسٹم پر مشکلات کا سامنا ہے۔
صدر کراچی چیمبر ریحان حنیف کے مطابق ایف بی آر نے ٹیکس گوشوارے جمع کرانے والے افراد کے پاس ورڈز تبدیل کردیئے ہیں جس کے باعث بالخصوص بیرونِ ملک یا سفر میں موجود ٹیکس دہندگان کو نئے پاس ورڈ کے حصول میں دشواری پیش آرہی ہے۔
ان کا کہنا ہے کہ بیرونِ ملک موجود کئی ٹیکس دہندگان کو نئے پاس ورڈ کا ایس ایم ایس موصول نہیں ہورہا جبکہ آئی آر آئی ایس پر غیر معمولی دباؤ اور سسٹم اوورلوڈ ہونے سے گوشوارے جمع کرانے کا عمل مزید متاثر ہورہا ہے۔
ریحان حنیف نے مطالبہ کیا کہ ایف بی آر فوری طور پر سابقہ پاس ورڈ بحال کرے تاکہ ٹیکس دہندگان آخری تاریخ سے قبل بلا رکاوٹ اپنے گوشوارے جمع کرا سکیں۔