وفاقی وزیر برائے بحری امور جنید انوار چوہدری نے نشاط گروپ کے چیئرمین میاں محمد منشا سے ملاقات کی، جس میں پاکستان کے بحری شعبے کی ترقی اور اس میں نجی سرمایہ کاری کے فروغ سے متعلق امور پر تبادلہ خیال کیا گیا۔
ملاقات کے دوران میاں محمد منشا نے نئی بندرگاہ کے منصوبے میں سرمایہ کاری کرنے میں دلچسپی کا اظہار کیا۔
اس موقع پر جنید انوار چوہدری نے کہا کہ نئی بندرگاہ کی تعمیر سے ملکی تجارت کو فروغ ملے گا اور برآمدی صنعتوں کو بہتر سہولتیں میسر آئیں گی۔ انہوں نے کہا کہ بندرگاہوں کی ترقی اور بحری شعبے کی استعداد بڑھانے کے لیے نجی شعبے کی شمولیت ناگزیر ہے۔
وفاقی وزیر کا کہنا تھا کہ نئی بندرگاہ کی تعمیر سے روزگار کے نئے مواقع پیدا ہوں گے اور پاکستان کو خطے میں ایک اہم تجارتی و ترسیلی مرکز بنانے میں مدد ملے گی۔