گزری پولیس نے بروقت کارروائی کرتے ہوئے ڈکیتی کی جھوٹی واردات کا ڈراپ سین کر دیا ہے اور رقم ہتھیانے کے لیے ڈرامہ رچانے والے نجی اکاؤنٹنٹ کو اس کے ساتھی سمیت گرفتار کر کے لوٹی گئی رقم برآمد کر لی ہے۔
12 نومبر 2026 کو حنیف نامی شہری نے پولیس مددگار 15 پر کال کر کے اطلاع دی کہ سلطان مسجد کے قریب موٹر سائیکل پر سوار دو مسلح ملزمان اس سے 3 کروڑ 75 لاکھ روپے چھین کر فرار ہو گئے ہیں۔ اطلاع ملتے ہی تھانہ گزری کی پولیس ٹیم فوری طور پر جائے وقوعہ پر پہنچی اور شواہد اکٹھے کر کے تفتیش کا آغاز کیا۔
ابتدائی تفتیش کے دوران پولیس کو مدعی حنیف کے بیانات میں واضح تضاد محسوس ہوا۔ تفتیشی عملے کو معلوم ہوا کہ ملزم ایک غیر ملکی خاتون کے پاس بطور اکاؤنٹنٹ ملازمت کرتا ہے اور ایچ بی ایل پلازہ سے رقم نکلوانے کے بعد خاتون کی جانب سے کسی ادائیگی کے سلسلے میں فیز 7 ایکسٹینشن جا رہا تھا۔ اس دوران غیر ملکی خاتون نے بھی اپنے ملازم کے مشکوک رویے کی نشاندہی کی، جس کے بعد پولیس نے حنیف کو حراست میں لے کر باقاعدہ پوچھ گچھ شروع کر دی۔
بینک ریکارڈ کی جانچ پڑتال سے یہ بات بھی سامنے آئی کہ بینک سے نکلوائی گئی اصل رقم 3 کروڑ 75 لاکھ نہیں بلکہ 3 کروڑ 9 لاکھ 76 ہزار 600 روپے تھی۔ سخت تفتیش کے دوران ملزم ٹوٹ گیا اور اس نے اعتراف کیا کہ اس نے رقم ہڑپ کرنے کی نیت سے اپنے ساتھیوں کے ساتھ مل کر ڈکیتی کا جھوٹا ڈرامہ رچایا تھا۔
پولیس نے گرفتار اکاؤنٹنٹ کی نشاندہی پر فوری چھاپہ مار کارروائی کرتے ہوئے اس کے ایک شریکِ جرم ساتھی کو بھی حراست میں لے لیا اور ملزم کے گھر سے تمام رقم برآمد کر لی۔ پولیس حکام کے مطابق واقعے کے چند ہی گھنٹوں کے اندر کیس حل کر کے دونوں ملزمان کو گرفتار کر لیا گیا ہے اور ان کے خلاف مزید قانونی کارروائی عمل میں لائی جا رہی ہے۔