حنا جاوید قتل کیس میں مقتولہ کے اہلخانہ کی جانب سے راولپنڈی پولیس کے خلاف دائر شکایت پر ریجنل محتسب پنجاب نے سی پی او راولپنڈی کو نوٹس جاری کر دیا۔
ریجنل محتسب پنجاب کی جانب سے جاری نوٹس میں سی پی او راولپنڈی کو شکایت کا جواب اور متعلقہ ریکارڈ پیش کرنے کی ہدایت کی گئی ہے۔ نوٹس کے مطابق متعلقہ ذمہ دار افسر 23 نومبر 2026 کو صبح 10 بجے شکایت کا جواب جمع کرائے گا۔
محتسب پنجاب کی جانب سے جاری نوٹس کے ساتھ مقتولہ کے اہلخانہ کی شکایت اور اس سے متعلقہ دستاویزات بھی منسلک کی گئی ہیں۔ نوٹس پنجاب محتسب ایکٹ 1997 کی دفعہ 10(4) کے تحت جاری کیا گیا ہے۔
کیس کی سماعت 23 نومبر 2026 کو صبح 10 بجے مقرر کی گئی ہے، جس میں پولیس کی جانب سے شکایت پر جواب اور متعلقہ ریکارڈ پیش کیا جائے گا۔
واضح رہے کہ مقتولہ حنا جاوید کے اہلخانہ نے کیس سے متعلق فورنزک رپورٹس کے حصول کے لیے ریجنل محتسب پنجاب سے رجوع کر رکھا ہے۔