اسلام آباد: ایف آئی اے افسر کے گھر ملازمہ کی ہلاکت، ڈائریکٹر معطل، دو ملزمان کا ریمانڈ حاصل

image

وفاقی دارالحکومت اسلام آباد کے علاقے پولیس لائن ہیڈکوارٹرز میں گریڈ 19 کے پولیس افسر اور ڈائریکٹر ایف آئی اے گوجرانوالہ زون محمد بن اشرف کی رہائش گاہ پر 13 سالہ گھریلو ملازمہ فاطمہ اصغر مبینہ تشدد کے باعث جاں بحق ہوگئی، جس کے بعد مقدمہ درج کرکے دو افراد کو گرفتار کرلیا گیا ہے۔

واقعے کا مقدمہ تھانہ شمس کالونی میں مقتولہ کے والد کی مدعیت میں درج کیا گیا ہے، جبکہ ایف آئی اے حکام نے فوری کارروائی کرتے ہوئے محمد بن اشرف کو ڈائریکٹر ایف آئی اے گوجرانوالہ زون کے عہدے سے معطل کرکے ایف آئی اے ہیڈکوارٹرز طلب کرلیا ہے، جس کا باقاعدہ نوٹیفکیشن بھی جاری کردیا گیا ہے۔

پولیس ذرائع کے مطابق ابتدائی معائنے کے دوران کم عمر بچی کے جسم پر مبینہ تشدد اور استری سے جلائے جانے کے نشانات پائے گئے ہیں۔ تفتیش کے دوران پولیس نے کمسن ملازمہ پر ڈنڈوں سے تشدد کی سی سی ٹی وی فوٹیج حاصل کرلی ہے اور تشدد کے لیے استعمال ہونے والے ڈنڈے بھی برآمد کرلیے گئے ہیں۔

ذرائع کا کہنا ہے کہ واقعے میں افشاں بی بی اور قاری علی رضا کے ملوث ہونے کے شواہد سامنے آنے پر پولیس نے نامزد ملزمہ سمیت دونوں افراد کو حراست میں لے لیا۔ پولیس نے دونوں مبینہ ملزمان کو عدالت میں پیش کیا، جہاں عدالت نے انہیں چار روزہ جسمانی ریمانڈ پر پولیس کے حوالے کردیا ہے۔

پولیس کے مطابق شواہد اور سی سی ٹی وی فوٹیج کی روشنی میں واقعے کی مزید تحقیقات جاری ہیں۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US