معروف ڈچ مصور ونسنٹ وین گوگ کی ایک نایاب پینٹنگ 19 کروڑ 4 لاکھ ڈالر میں فروخت ہوگئی، جس نے مصور کے کسی بھی فن پارے کی نیلامی کا سابقہ ریکارڈ توڑ دیا۔
غیر ملکی میڈیا کے مطابق 1890 میں تخلیق کی گئی پینٹنگ ’شاٹینیے آن فلور‘ (Chataigniers en fleurs) تقریباً 60 برس تک عوام کی نظروں سے اوجھل رہی۔
نیویارک کے نیلام گھر سوتھبیز میں فروخت ہونے والی اس پینٹنگ میں شام کی روشنی میں کھلتے ہوئے شاہ بلوط کے درخت دکھائے گئے ہیں۔
رپورٹس کے مطابق یہ فن پارہ معروف آرٹ ڈیلر ولیم ایکواویلا نے خریدا جبکہ مہنگائی کے اثرات کو مدنظر رکھتے ہوئے یہ نیلامی کی تاریخ کی چھٹی مہنگی ترین پینٹنگ بھی قرار دی جارہی ہے۔
اس سے قبل وین گوگ کی پینٹنگ کا نیلامی ریکارڈ 2022 میں قائم ہوا تھا، جب ان کا ایک فن پارہ 11 کروڑ 72 لاکھ ڈالر میں فروخت ہوا تھا۔