اسلام آباد: مکان سے 800 کلو حرام گوشت ضبط، 12 زندہ اور ایک مردہ گدھا ودیگر جانور برآمد

image

وفاقی دارالحکومت اسلام آباد کے علاقے سیکٹر ڈی 14 میں پولیس اور فوڈ اتھارٹی کی مشترکہ ٹیم نے غیر قانونی اور مضر صحت گوشت کی تیاری میں ملوث ایک نیٹ ورک کا سراغ لگاتے ہوئے 800 کلوگرام گوشت قبضے میں لے لیا ہے۔

تھانہ گولڑہ کے حدود میں واقع ایک گھر پر مارے گئے اس چھاپے کے دوران حکام کو گدھوں اور کتوں کا مبینہ گوشت ملا۔ تلاشی کے دوران احاطے سے 12 زندہ اور ایک مردہ گدھے سمیت پانچ کتے بھی برآمد ہوئے۔ اس کے علاوہ وہاں سے 21 کچھوے، ایک گیدڑ اور ایک زندہ پینگولین بھی بازیاب کرایا گیا، جبکہ اس تمام کاروبار یا گوشت کی ترسیل کے حوالے سے کوئی قانونی دستاویزات یا اجازت نامہ نہیں مل سکا۔

انتظامیہ نے برآمد ہونے والے گوشت کو فوری طور پر تلف کردیا ہے اور تمام زندہ جانوروں کو تحفظ کے لیے محکمہ وائلڈ لائف کے سپرد کردیا ہے۔ گھر کی تلاشی کے دوران ایک غیر ملکی باشندے کے پاسپورٹ اور ویزا سے متعلق دستاویزات بھی حکام کے ہاتھ لگی ہیں۔

چھاپے کے وقت عمارت میں کوئی ملزم موجود نہیں تھا جس کے باعث مکان کو سربمہر کردیا گیا ہے۔ فوڈ اتھارٹی کی شکایت پر نامعلوم افراد کے خلاف اسلام آباد کیپیٹل ٹیریٹری فوڈ سیفٹی ایکٹ کے تحت مقدمہ درج کر کے ملزمان کی گرفتاری اور نیٹ ورک کے دیگر ارکان تک پہنچنے کے لیے تفتیش شروع کردی گئی ہے۔


Meta Urdu News: This news section is a part of the largest Urdu News aggregator that provides access to over 15 leading sources of Urdu News and search facility of archived news since 2008.

Follow US