قومی کرکٹ ٹیم نے ویسٹ انڈیز کے خلاف ٹی ٹونٹی سیریز کے لئے اپنی تربیتی سیشن کا آغاز کرنے سے قبل اپنا کچھ وقت بارباڈوز کے خوبصورت ساحل سمندر کے ریسورنٹ میں گزارا، جس کی تصاویر سوشل میڈیا پر شیئر کی گئیں۔
پی سی بی کی جانب سے کھلاڑیوں کی ساحل سمندر پر موج مستی کے دوران کئی تصاویر شئیر کی گئیں مگر تصاویر میں سابق کپتان میں سرفراز احمد کہیں نظر نہیں آئے ، جس کی وجہ سے ان کی اہلیہ اور پاکستان کرکٹ بورڈ کے درمیان دلچسپ تبادلہ ہوا۔
پی سی بی کے ٹویٹر اکاؤنٹ پر شیئر کی گئی تصاویر میں فاسٹ بالر حسن علی، آل راؤنڈر فہیم اشرف، اور دیگر کھلاڑی اچھا وقت گزارتے دکھائی دے رہے ہیں۔ لیکن سرفراز احمد کہیں نظر نہیں آرہے جس پر سرفراز احمد کی اہلیہ کا ٹویٹ سامنے آیا۔
سابق کپتان کی اہلیہ خوشبخت نے ٹوئٹ میں پوچھا کہ میرے میاں کہاں ہیں جس پر پی سی بی کا بھی جواب سامنے آیا۔
خوش بخت کے سوال کے جواب میں ، پی سی بی نے سرفراز کی ایک تصویر شیئر کی، جہاں سابق کپتان کو ہلکے نیلے رنگ کے شارٹس اور سرخ بنیان پہنے ہوئے سمندر سے باہر آتے دیکھا جاسکتا ہے۔