آپ نے یقیناً یہ کہاوت سنی ہوگی کہ "شوق کا کوئی مول نہیں ہوتا"، یہ بلکل درست بات ہے کیونکہ انسان اپنی خواہشات کے حصول کیلیئے ہر ممکن کوشش کرتا ہے چاہے پھر کتنے ہی سال کیوں نہ لگ جائیں۔ اور ایسا ہی ایک شوق پڑھائی کا ہے جسے سعودی عرب کی ایک 110 سالہ خاتون سچ کردکھا یا ہے۔
سعودی عرب کے صوبہ عسیر کے علاقے بیشا کی رہائشی 110سالہ نودا القحطانی نے گرمیوں کے سیزن میں منعقدہ سمر لٹریسی کورس میں شرکت کی اور کچھ ہی دنوں میں کورس مکمل کرکے پڑھنا اور لکھنا شروع کر دیا ہے۔
110 سالہ نودا القحطانی کے بیٹے کا کہنا ہے کہ والدہ کو موسم گرما میں دینی تعلیم حاصل کرنے کے لیے ایک کورس میں رجسٹر کروایا تھا اور امی کو خوشی ہے کہ انہیں یہ موقع ملا، انہوں نے دینی معاملات کو جاننے کے لیے تعلیم حاصل کی۔
خاتون کے بیٹے کا کہنا ہے کہ کورس مکمل کرنے کے بعد ان کی والدہ اب قرآن پڑھ اور لکھ بھی سکتی ہیں۔
110 سالہ خاتون کا کہنا ہے کہ تعلیم حاصل کرنے کی کوئی عمر نہیں ہوتی، میں بہت خوش ہوں کہ مجھے یہ موقع ملا اور اس کورس کی بدولت اب میں خود قرآن پاک پڑھنے کے قابل ہوگئی ہوں۔
خاتون کی ایک ویڈیو سوشل میڈیا پر وائرل ہوئی جس میں وہ پنسل سے کچھ لکھ رہی ہیں اور ساتھ ہی تعلیم حاصل کرنے کی اپنی کوششوں کی تعریف کر رہی ہیں۔
سوشل میڈیا پر وائرل اس پوسٹ پر صارفین نے بہت خوشی اور خاتون کیلئے نیک تمناؤں کا اظہار کیا ہے۔