بالی ووڈ اداکاروں کی زندگی ایسے کئی واقعات سے بھری ہے جو کہ لوگوں کی توجہ کا مرکز بن جاتی ہے، ایسے ہی بھارتی فلموں میں بطور ولن اور کامیڈی کردار نبھانے والے شکتی کپور بھی ہیں۔ انہوں نے اپنی محنت اور لگن سے فلمی دنیا میں اپنا ایک مقام بنایا ہے، خاص کر انکے کامیڈی کردار آج بھی مداحوں کو بہت پسند ہیں۔
ایک بار شکتی کپور سے انکی شادی کے بارے میں پوچھا گیا تو وہ بتاتے ہوئے رنجیدہ ہوگئے، دراصل شکتی کپور اور لتا منگیشکر کی بھتیجی شوانگی کولہا پور ایک دوسرے کو بے حد چاہتے تھے لیکن دونوں کے درمیان رکاوٹ گھر والے تھے، جو نہیں چاہتے تھے کہ یہ آپس میں ملیں اور شادی کریں۔ دونوں گھرانوں کی ناراضگی کے خلاف جا کر شکتی اور شوانگی نے بھاگ کر شادی کرنے کا فیصلہ کیا۔
جب شکتی اپنی اہلیہ کو والدین سے ملوانے لے کر آئے تو والد شدید ناراض تھے، والدہ کا خیال تھا کہ ایک بار بہو سے مل تو لیں، لیکن والد نہ مانے۔ شکتی اور ان کی اہلیہ نے بہت مشکل وقت دیکھا کیونکہ شکتی کے اپنے گھر والے اور سسرال والے انھیں رکھنے کو تیار نہیں تھے۔
تاہم کچھ عرصے بعد جب والد سے بہو کی ملاقات ہوئی، والد پر جب بہو کی حقیقت عیاں ہوئی کہ شوانگی لتا منگیشکر کے گھرانے سے تعلق رکھتی ہیں، تو اس وقت والد نے شکتی کپور کو دیکھ کر کہا کہ تیری ساری غلطیاں معاف ہو گئیں آج، تو نے اتنے بڑے گھرانے میں شادی کی۔
دراصل شکتی کپور کے والد لتا جی کے مداح تھے، ان کے گانوں کو بے حد پسند کرتے تھے، ساتھ ہی ان کی فرمائش پر بہو نے سسر کو گانا بھی گا کر سنایا، ان کی مدہم آواز کا جادو اس حد تک سسر پر ہوا کہ چہیتی بیٹی کے طور پر سسر نے بہو کو قبول کیا۔
اس وقت اداکار اپنا زیادہ تر وقت گھر میں رہ کر گزارتے ہیں، جبکہ وہ کئی تقاریب میں بھی شرکت کرتے ہیں، گلوکاری اور رقص کے مقابلوں میں بھی بطور مہمان مدعو ہوتے ہیں۔