“15 برس کی عمر میں شادی اور اب بچہ بھی“
“ فاخر کی تو ابھی تک داڑھی نہیں نکلی اور یہ باپ بن رہے ہیں“
“کیسے ماں باپ ہیں جنھوں نے اپنی بیٹی کو ایسا کردار ادا کرنے کی اجازت دی جبکہ وہ بچی واقعی صرف 15 برس کی ہے؟“
سوشل میڈیا پر اس وقت اس طرح کے کئی تبصرے مشہور ڈرامہ سیریل “مائی ری“ کی نئی قسط دیکھنے کے بعد کیے جارہے ہیں جس میں ڈرامے کی مرکزی کردار عینی کو حاملہ دکھایا گیا ہے جبکہ اس کی عمر محض 15 سال ہے۔
ڈرامے کی نئی قسط میں دکھایا گیا ہے کہ عینی جو کمرے کا دروازہ کھولنے جاتی ہے اچانک چکرا کر گر پڑتی ہے جس کے بعد اسے فوری اسپتال لے جایا جاتا ہے جہاں ڈاکٹر معائنہ کرنے کے بعد عینی کی والدہ اور شوہر پر کم عمری کی شادی کرنے پر برس پڑتی ہیں اور عینی کے حمل کی تصدیق کرتی ہیں۔
سوشل میڈیا پر صارفین کا کہنا ہے کہ بے شک ڈرامہ کم عمری کی شادی کے خلاف بنایا گیا ہے لیکن اس میں بھی ایک بچی کو حاملہ دکھانے کی ضرورت نہیں تھی جبکہ ایک صارف کا کہنا ہے کہ ڈرامے میں دونوں بچوں کے درمیان رومانوی مناظر دکھائے جارہے ہیں اور دکھایا جارہا ہے کہ لڑکا لڑکی کا خیال رکھ رہا ہے تو کیا لوگ اب کم عمری کی شادی کو غلط سمجھیں گے؟