پاکستانی شوبز انڈسٹری کی معروف اداکارہ علیزے شاہ کے خلاف ساتھی اداکارہ کو تشدد کا نشانہ بنانے اور ان کو دھمکیاں دینے کے الزام میں اسلام آباد پولیس اسٹیشن میں درخواست دائر کردی گئی ہے۔
علیزے کیخلاف یہ رپورٹ اداکارہ منسا ملک نے درج کروائی ہے۔
رپورٹ کے مطابق، انہوں نے اسلام آباد کے ویمن پولیس اسٹیشن میں دائر درخواست میں بتایا کہ، 15 اگست کو ڈرامے کی شوٹنگ کے دوران علیزے شاہ نے ان کے اوپر جلتا ہوا سگریٹ پھینکا اور سنگین نتائج کی دھمکیاں بھی دیں۔
اداکارہ نے درخواست میں موقف اختیار کیا کہ علیزے شاہ نے مجھے جوتوں سے بھی مارا، میں نے بڑی مشکل سے اپنی جان بچائی۔ ساتھ ہی انہوں نے علیزے پر منشیات استعمال کرنے کا بھی الزام عائد کیا ہے۔
ایسا کرنے کی وجہ بتاتے ہوئے منسا ملک نے کہا کہ، علیزے مجھ سے حسد کرتی ہے پیشہ وارانہ طور پر۔
منسا نے درخواست میں یہ بھی درج کروایا کہ، اس سے پہلے بھی ایک پروڈکشن ہاؤس نے علیزے شاہ کے برے رویے کی وجہ سے شوٹنگ روک دی تھی اور ان کیخلاف ایف آئی آر درج کرائی تھی۔
واضح رہے کہ یہ پہلی بار نہیں ہے بلکہ اداکارہ علیزے شاہ ماضی میں بھی مختلف تنازعات کا شکار رہی ہیں۔