بالی ووڈ کی سینئر اداکارہ شرمیلا ٹیگور نے اپنے بیٹے سیف علی خان کی شادی اور کورونا وباء کے دوران کینسر کی تشخیص کے حوالے سے پہلی بار ٹی وی شو میں کھل کر بتایا۔
اداکارسیف علی خان اور ان کی والدہ اداکارہ شرمیلا ٹیگور نے ٹاک شو کافی ود کرن میں شرکت کی، جہاں میزبان کرن جوہر نے انکشاف کیا کہ فلم "راکی اور رانی کی پریم کہانی" میں عالیہ بھٹ کی دادی کے کردار کے لیے پہلا انتخاب شرمیلا ٹیگور تھیں۔
کرن جوہر کی بات کو جاری رکھتے ہوئے شرمیلا ٹیگور نے بتایا کہ، "اس وقت مجھے کینسر کی تشخیص ہوئی تھی اس لیے فلم میں کام کرنے سے انکار کرنا پڑا۔"
شو کے دوران سیف علی خان نے بتایا کہ، امرتا سنگھ سے شادی پر والدہ ناراض ہوئیں اور خوب روئی تھیں، انہوں نے بتایا کہ میں نے امرتا سنگھ سے خاموشی کیساتھ شادی کی تھی ، اپنے والد منصور علی پٹودی اور والدہ شرمیلا ٹیگور کو بھی نہیں بتایا تھا۔
سیف علی خان نے بتایا کہ والدہ نے شادی کا سن کر کہا کہ تم نے مجھے بہت دکھ پہنچایا ہے، تم نے شادی سے متعلق مجھے بتایا کیوں نہیں؟، والدہ روئیں بھی تھیں۔