“مجھے نظر آرہا تھا کہ یا تو میری طلاق ہوجائے گی یا پھر میں بیوہ ہوجاؤں گی لیکن شوہر سے بہت محبت تھی اس لئے بہت دعائیں کرتی تھی کہ شادی چل جائے۔ ہر سال اعتکاف بھی کرتی تھی لیکن بالآخر شادی ٹوٹ گئی“
یہ کہنا ہے ملک کی مشہور ماہر نجوم سامعہ خان کا جنھوں نے حال ہی میں ایک پوڈکاسٹ میں شرکت کی اور اپنی نجی زندگی سے متعلق وہ باتیں کیں جو لوگ نہیں جانتے۔ سامعہ خان نے بتایا کہ انھیں بچوں کا بہت شوق ہے لیکن ان کی اپنی کوئی اولاد نہیں۔
“میں نے اپنے بہن بھائیوں کے بچوں کو سگی اولاد کی طرح پالا لیکن اپنے بچے نہیں ہوئے جس کے بعد بہن کا ایک دن کا بچہ گود لیا اس کا نام محمد رکھا ہے اور اب وہ بڑا ہوگیا ہے۔ محمد کو بھی علم نجوم وراثت میں ملا ہے اس لئے میں نے اسے قرآن حفظ کروایا ہے تا کہ اس میں کسی قسم کا غرور پیدا نہ ہو“
سامعہ خان نے بتایا کہ ان کے اور ان کے شوہر کے درمیان کچھ ایسے اختلافات ہوگئے تھے جنھیں ختم کرنا ممکن نہیں تھا اگرچہ وہ اس کی تفصیل میں تو نہیں گئیں لیکن سابق شوہر کے بارے میں بات کرتے ہوئے ان کی آنکھوں میں آنسو آگئے تھے۔