اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے انٹرمیڈیٹ گیارہویں جماعت آرٹس ریگولر، آرٹس پرائیویٹ اور کامرس پرائیویٹ گروپس کے سالانہ امتحانات برائے 2015ء کے امتحانی فارم جمع کروانے کی تاریخوں کا اعلان کردیا ہے۔محمد عمران خان چشتی کے مطابق آرٹس ریگولر کے امتحانات میں شرکت کے خواہشمند اور اہل امیدوار اپنے امتحانی فارم بروز پیر 12جنوری 2015ء سے بروز بدھ 28جنوری 2015ء تک اپنے متعلقہ کالجوں میں جمع کرواسکتے ہیں جبکہ آرٹس پرائیویٹ اور کامرس پرائیویٹ کے امیدوار اپنے امتحانی فارم ضروری تصدیق کے بعد انہی تاریخوں میں اعلیٰ ثانوی تعلیمی بورڈ میں واقع بینک برانچ میں جمع کرواسکتے ہیں۔کالجوں کو ہدایت کی گئی ہے کہ وہ تمام ریگولر امیدواروں کے امتحانی فارم اور فیسوں کے پے آرڈربروز پیر 2فروری اور بروز منگل 3فروری 2015ء تک بورڈ آفس کے اکائونٹس سیکشن میں جمع کروادیں۔ناظم امتحانات نے مزید بتایا کہ مقررہ تاریخ تک امتحانی فارم جمع نہ کروانے والے امیدوار 29 جنوری سے 16 فروری تک 200روپے لیٹ فیس کے ساتھ، 17فروری سے 24فروری تک 500روپے لیٹ فیس کے ساتھ اور 25فروری سے 3مارچ 2015ء تک ایک ہزار روپے لیٹ فیس کے ساتھ اپنے امتحانی فارمز جمع کرواسکتے ہیں۔